Done Bete da le lenghe sclete

il titul dal blog al nas di un m没t di d卯 che si usave a Durlasse, il pa卯s di me mari e chel dul脿 che soi nade

Lant a Messe

 

Al tignive i voi sieràs, il cjâf voltât viers il cîl e al predicjave a noaltris fruts, ducj robe sui vot ains. Jerin alì prime di confessâsi, figurìnsi ce robonis che vevin di vè cumbinât!

Lui, forsi un missionari, in ogni câs un predi da fûr parochie, sui 30 ains, al faseve l’elenc di ducj i nestris pecjâts, par no che no si dismenteassin nissun e, dato cal jere, al domandave ancje se si erin tocjats.

Se chest a nol fos mai sucedût prime, lui al dave juste l’imput par che lu savessin e cussì, jal lassin a contà in confession.

A mi, ancje se piçule, la robe a mi veve parût ambigue.

 

Gno pari a mi veve fate iscrivi a l’Azion Catoliche e cussì lavi a scoltà l’arcipredi cal tabaiave da la Madone. A lu faseve in t’un mût cal sameave in braç a l’estasi e a mi a mi dave propite fastidi.

Magari a si varà ancje acuart, parcè a mi a no mi dave nissune impuartance, mentri che invezi, a altris mes amîs, che forsi a li viodeve frutis piis, ai dave considerazion.

A cutuardis ains, propite parcè che jeri Aspirante da l’Azion Catoliche, jeri lade a fa un ritîr spirituâl al Cjastiel di Tresésin, trê diis di cidinôr e di altris noiosariis.

Si ere controladis da doi predis, un vecjo e un zovin - chest simpatic - e da altris befanatis di feminis.

Une me amie, bielissime e dal fisic plui madûr da la so etât, ca durmive ta la cjamare tacade a la me, a mi veve contât – e ancjemò a si lu vise – che dilunc la gnot ai vevin tucât ta la puarte, la vôs a jere di om, e ai diseve “apri, apri”.

Nus fevelavin dal diaul e da li sôs tentazions ma le me amie a veve ben capît cui cal jere chel vecjo diaul.

 

Ancje il predi cal judave l’arcipredi in parochie a mi veve fate slontanà dal la a dutrine ta l’an da la cuarte elementâr.

Lui al veve rivuart dome pai masclis, forsi li frutis ai davin fastidi, ma no par chest, su di lui, a si podevin fa malignitâts.

Al jere un patît dal balon e a si lu cjatave cal zuiave cui fruç tal biel mieç da la place. Si diseve di lui cal fasès gjespui a la svelte par la a viodi la partide tal campo.

Al jere ancje un bielissim fantat e lis feminis a si lu rimiravin ma, nancje in chest sens, a no son mai saltadis fûr cjacaris.

 

Ancje il plevan cal jere rivât dopo a mi veve rotis lis citis. Al faseve predicjis dolà cal dave cuintri a la zoventût. Cuant che si cjacarave cun lui al sameave ben propens a scoltâti. Dopo, però, dut al deventave pretest par scaiâlu cuintri in ta la messe da la domenie.

 

Cussì, a sedis ains, vevi decidût di no volè savêndi di predis e confessions. Gno pari a la pative e nol voleve scoltà nissune me rason. Al diseve che cussì a bisugnave fa, parcè cussì a nus vevin insegnât i nestris vecjos.

Par Nadâl e Pasche al varès volût puartâmi a Madone di Gracie a Udin par fami confessà dai fraris e dopo scoltà la Messe.

A Messe soi lade une volte ma par il rest mi soi simpri oponude.

 

Jeri aromai fantate e no savevi nancje cui cal fos il plevan da la parochie. Un dî, co stavi in profumarie e al jere jentrât un siôr, che la profumere a tratave cun tant rivuart, dopo o vevi domandât cui cal fos.

Je a jere restade imbambinide pa la me ignorance: a si tratave dal plevan in borghês.

Cualchi timp dopo, chest om, savint che gno pari al jere malât, al jere vignût a cjatâlu e cu l’ocasion vin ancje un biel poc tabaiat. Chest predi a mi a mi ere plasût une vore, colt, laureât in teologjie a Viene e, pardabon, tant simpatic.

Un om cence ipocrisiis, sclet. In ogni câs no soi tornade a messis e gjespui ma, almancul, no jeri plui rabiade cul clericam.

La imagjine e je cjolte sul web

Postato da: DoneBete a 17:20 | link | commenti (5) |
lant a messe

Su la comozion

 

Ai let che Gillo Dorfles , tal 1965, al stimave la facil comozion cetant che l'ecuivalênt dal "kitsch": "l'uomo di cattivo gusto riesce perfino a trasformare le situazioni-limite dell'esistenza: morte, nascita, sesso, patria, guerra in commoventi episodi patetici".

 

Sta di fat che jo no rivi a comovimi par ogni situazion. Provi un grant dolôr par chel che di mal al po sucedi ai fruts, a lis personis che no son avonde buinis di difindisi dai prepotents e mi è capitât ancje di vai par int che nancje no cognòs e di no bati cee, invezi, par altre che no mi è scognossude.

 

Il gno mecanisim da la comozion al meretarès, salocor, di jessi studiât.

 

Il dì cal je muart Claudio Capone, la vôs che conte i documentaris di “Quark”, ai vaiût dut il di e, tai diis dopo, a pene co sintivi la television o leievi di lui su internet, vie di gnûf a vaì.

 

Timp fa, par la maniere che aromai a si dan lis notiziis, cun rapine, cence nissun rispiet par lis personis, o ai savût che Peter Falk, il straordenari “Tenente Colombo”, al je malât di Alzheimer, ai vût un scuancàs malandret. Par la prime di viodilu sbatût in mût crudêl par television e internet come un fenomin di baracon.

Po jo sai ce ca compuarte cheste malatie e ancje lis voltis co sint a dì, a la lizere, magari par mincjonà une persone, frasis dal gjenar “io penso che i malati di Alzheimer siano più intelligenti di chi fa i programmi tv” (lete ta un blog), a mi ven une rabie imbesteade.

La imagjine e je cjolte sul web

Postato da: DoneBete a 11:36 | link | commenti (2) |
su la comozion

Il plui grant Dulcamara

 

Il 12 di Març passât jo o jeri presinte cuant che il Sindic al veve consegnât, a Alfredo Mariotti, la civiche benemerence dal “Bronzetto d’oro di Teor”, un premi cal ven dât a chei concitadins che, po jessi par vie da musiche, leterature, o ativitât lavorative, e an dât lustri a la Comunitât di Teôr.

Alfredo, da îr, a no l’è plui su cheste tiere. Lui al jere nât a Romans di Var ma a Teôr al jere leât par vie che la so mame a jere nade alì.

Cussì a recitave la motivazion dal premi che, achì, o ai volût voltà par furlan:

Se i cuatri luminôs secui di storie dal teatri musicâl a volessin, ogni tant, concedisi il privileç di ricognossi un assolût, eterni archetip vocâl, il nûfcent, par chel ca rivuarde l’opare comiche, nol podarès che rivolzisi a l’artist furlan Alfredo Mariotti e ai sôs oltri cincuante ains di filade cariere svolte tai plui grancj teatris di dut il mont. Al à lavorât cui plui grancj diretôrs d’orchestre da seconde metât dal nûfcent. Un centenâr di parts diviersis chês che lui al à interpretât, ma il personaç che a lu an consacrât a la celebritât a son: Don Pasquale, interprete di numerosissimis regjistrazions RAI al je stât protagonist di diviers films d’opare. Vastissime ancje la discografie pa lis etichetis: Decca, Philips, Emi, Deutsche Grammophon, Rca Bongiovanni, e vie indenant. Trê ains fa, dopo oltri cincuantetrê ains di cariere, al da l’adiu a lis senis cun t’un enesim e memorabil “Barbiere di Siviglia” a Tokyo e cun tredis replichis di “Don Pasquale", all’Opera Comique di Parigi.

Il 13 di Jugn a je stade l’ultime volte co ai viodût Alfredo. Jerin a cene cun lui a Durlasse, un grup di melomanìacs, riunîts da Federico che al considere Alfredo un dai siôs trê mîts: Callas, Corelli, Mariotti.

Federico a mi à dit che al viôt Alfredo a saludânus, sentât su di un caretin, come ta la part di Dulcamara ta "L'elisir d'amore".

 

La imagjine e je cjolte sul web

Postato da: DoneBete a 12:11 | link | commenti (2) |
il plui grant dulcamara

Il labirint

 

Me sûr Ninine a dîs ca no si vise, ma jo mi ricuardi ben che, tai ains '50, a vendevin une cartuline cu la foto dal nestri graziôs zardinut e tante di scrite "giardini a Stelute".

 

Dopo, ai prins dai ains '60, par lassà spazi a la oficine di gno pari, il zardinut devant cjase al jere stât eliminât ma salvadis dutis lis plantis di bos ca lu formavin.

 

Il zardinîr Arturo, dut di bessôl, al veve traplantât ogni plantute dolà che prime al jere un grant ort e ca no si rivave nancje a doprâlu dut par fa verduris.

 

Dilunc cui ains, il zardin, al je deventât une maravee, salvadi ma bielissim.

 

Lis cisis di bos a son altonis e a mi a mi par di ve il labirint di Vile Pisani a Stra. Jo esagjeri, ca ben sintînt, però soi une vore braurose dal mio zardin cal va indenant da cincuante ains.

 

Vinars, però, mi è rivade une notizie ca mi à fat vaì.

 

Mi lâ date il Sindic. Mi puartaran vie une buine fete dal mio zardin parcè al ocor di fa un taront par smaltì il trafic da strade.

 

Cheste a je le vite. Se il destin a ti è stât amì a rive ancje la volte ca ti mole un pugn tal cûr.

La imagjine e je cjolte sul web

Postato da: DoneBete a 12:11 | link | commenti (1) |
il labirint

Une femine grandiose

 

Îr di sere, su tele 4, e an mandât in onde une biele interviste a Fernanda Pivano dolà che je a contave di cuant che Hemingway, tal 1948, al jere a Cortina e al voleve incontrâle.

 

Ains prime, dilunc la ocupazion naziste di Torin, Fernanda a jere stade arestade parcè in cjase ai vevin cjatât il contrat par voltà par talian "Addio alle armi".

 

Hemingway, da Cortina, ai veve mandât une cartuline che je a crodeve un scherç e a la veve butade vie. Dopo la seconde, dolà ca i scriveve cal sarès lât lui a Torin par incontrâle, alore a jere partide di corse a la volte di Vignesie e dopo, cun tun altri trenin, a jere rivade fin a Cortina.

 

A lu veve cjatât a taule cun cuissà ce tantis personis, parcè lui a nol faseve regâi ma i plaseve tant ufrì di mangjà.

 

Che gnot alì no an mai smetût di tabajâ e no, "purtroppo", à dite, di "scopare".

Ai veve parfin insegnât a cjantâ "Tutti mi chiamano bionda, ma bionda io non sono: porto i capelli neri, porto i capelli neri".

 

Fernanda, dopo la muart di Hemingway, e à savût da la so femine che prin di sparâsi lui al veve cjantât cheste cjançonute.

A la fin da interviste, par fai une sorprese, al jere presint cualchidun, ca no si viodeve ta riprese, cal intonave la cjançonute compagnansi cu la ghitare.

 

Ancje Fernanda a veve scomençât a lai daûr, ma subite dopo a je sclopade a vaî come une frute.

 

Ce grop in gole co ai mentri che scrîf chestis cuatri riis ...

La imagjine e je cjolte sul web

Postato da: DoneBete a 16:13 | link | commenti (9) |
une femine grandiose

Postato da: DoneBete a 18:30 | link | commenti (6) |
i sotans

Nûf di Otubar dal 1963

 

O jeri une frute scarmuline e, secont il miedi, bisugnave fami operà lis tonsilis.

 

Une dì o jeri in ostarie, po stai a comprà un cuintin di sgnape par meti tai crostui, il miedi al jere alì par cjolisi un cafè e pene ca mi à viodude mi à fat vierzi la bocje, tirà fûr la lenghe e po dimi "che brutte tonsille, bisognerà operarle".

 

Fatostà che chel an alì vevi di là in prime medie ma tal stes timp di ricoverâmi par vie ta lis tonsilis.

 

La mutue dai artesans, cal veve mio pari, a dave che podevi sta trê dîs in ospedâl, mentri che invezi, di norme, i fruts a vignevin mandâts a cjase subite dopo l'operazion.

 

Al jere il secont dì co stavi alì e vevi par compagne di stanze une fantate sui vinç ains, une infermiere, ca pative di dolôrs mentri che jo stavi avonde ben.

 

Viers sere a jere vignude a cjatâmi me mari e propite je a mi à contât ce cal jere sucedût e chel che veve sintût par radio.

 

Mi veve dit di tancj fruts ca jerin muarts par vie di une dighe ca jere sdrumade, tun puest che jo no vevi mai sintût a dì, il Vajont.

La imagjine e je cjolte sul web

Postato da: DoneBete a 12:32 | link | commenti |
n没f di otubar dal 1963

Il cjar dai coscrits

 

Bete, di cjars dai coscrits, an da veve aromai viodûts pi di cualchidun, sedi di chei dal siò paîs che di altris bandis, ca rivavin fin a Stelute a fâ la sfilade.

 

Ma un cjar maraveôs come chel dai fantats di Bertolasse, chei da la classe 1937, a non da veve mai viodûts.

 

Ta chel an al jere coscrit ancje siò cusin Bertoldino e cuant che il cjar al jere passât devant cjase di Bete, Bertoldino al jere smontât par saludà i parincj.

 

A Bete, il cjar, ai veve parût un dragon e je a jere tal stes timp incjantade ma ancje plene di pôre.

 

Bertoldino ai veve contât ca si tratave di un dinosaur, un non che par Bete al jere une novitât.

 

Cun ramacis di pin a jerin rivâts a meti adun une sagume che, pardavêr, a faseve cetante impression.

 

La code lungjone, ca si strissinave su la strade, il cjâf cal niçave e dutis lis spatulis biel che parsore dal cuarp dal grant besteon.

 

Il tratôr ca lu tirave no si rivave nancje a viodilu.

 

Il passaç dal cjar dai coscrits al meteve simpri une grande ligrie. I fantats a saludavin dutis lis feminis, bielis e brutis, zovinis e vecis, une bote di vite prin di la sot la naie.

 

L'an dopo, Bete, a sperave che chel cjar al sarès tornat a passà, parcè a no saveve che ogni an, il cjar, al veve di jessi diferent da l'an passât.

La imagjine e je cjolte sul web

Postato da: DoneBete a 12:03 | link | commenti (2) |
il cjar dai coscrits

Il vestît di organdis

 

Bete, in tierce elementâr, ai veve dit un biel no a la mestre ca i veve ufiert di fa la part di une da lis trê fîs di Garibaldi ta la recite par i cent ains da l’Unitât d’Italie.

 

La mestre a veve dât la part a dôs frutis cence nancje fai fa lis provis, mentri che a si ere riservade di decidi, tra Bete e un’altre frute, pa la part da la tierce fie da l'eroi dai doi monts.

 

La mestre, secont Bete, a no tignive cont che je, la part, a la saveve benon, mentri chi che altre frute a no rivave a fassile jentrà a memorie.

 

Cussì, orgoiose e cence esitancis, a veve preferît la a fa part dal coro, a cjantà

 

Si scopron le tombe, si levano i morti

i martiri nostri son tutti risorti!

Le spade nel pugno, gli allori alle chiome,

la fiamma ed il nome d'Italia nel cor.

 

Tant ben che l'an dopo, propite dongje cjase, a vevin fat su une scuele gnove. Tal cuartîr a jerin stadis costruidis lis cjasis "Fanfani", alì a jerin rivâts une vorone di fruç che prime a stavin ta un campo, come sfolâts dopo la vuere.

 

Une scuele bielissime, cun tun atrio tal mieç e lis cinc aulis ator.

 

La mestre di Bete a jere un tesaur, a si clamave Carmen, e a rivave in tren da Tierç di Aquilee.

 

A jere zovine, intor dai 30 ains, e a no faseve parzialitâts tai confronts di nissun. Po, la classe a jere miste e cussì al jere ben di podè confrontassisi cui masiius.

 

Bete, ta chel an alì, a si ere rafade dai displasês da l'an prime. La mestre Carmen ai veve dât la part di Marie da ta la recite di Nadâl e ancje che di presentadore ta che da fin da l'an di scuele.

 

Par cheste recite Bete a veve intor un abitin ca jere rivât dongje da so sûr Chicute. Mirte, la sûr sartore, a lu veve tirat fûr dal vestît di comunion e sot da l'organdis trasparent a jere stade metude une fodre colôr rose.

 

Chel an alì, par Bete, a le stât il plui biel da la so infanzie.

La mestre Carmen a veve dât impuartance a dutis lis passions di Bete che, oltri al recità poesiis al jere ancje il disen.

La imagjine e je cjolte sul web

Postato da: DoneBete a 00:02 | link | commenti |
il vest卯t di organdis

La cjavale di Siôr Vico

 

Siôr Vico al veve cjase a Bertolasse.

Lui, un inventôr, a si ere parfin costruît un piçul aeroplan. Ben no mi visi, ma crôt che, dopo un tentatîf di svol, al sedi lât a sbati cuintri un mûr.

 

Siôr Vico al veve une siervute ca lave a cuistà i ous ta lis fameis dai contadins e, tornant a cjase, gjavantju fûr da lis sachetis dal grimâl, a ju faseve zirà par aiar, come ca fossin stâs balutis di len.

 

Me none a no podeve sopuartâmi cuant che vevi la pinie masse lungje e, par mandâle in bande, davi une scjassadine di cjâf. Alore a mi diseve: “fati taià che pinie alì, che tu mi someis la cjavale di Siôr Vico”

 

Sior Vico al lave a passà l’invier a Messine e la so fin a je stade propite alì, in conseguence dal taramot dal 1908.

La imagjine e je cjolte sul web

Postato da: DoneBete a 12:13 | link | commenti |
la cjavale di si么r vico