Done Bete da le lenghe sclete

mercoledì, 02 gennaio 2008

Me sôr Mirte a faseve le sartore. A veve imparât il mistêr ca ere frutate. Ogni dì, quant ca lave a fà le garzone, a pasave a peit devant di un cantêr e lì, un vecju muradôr ai fiscjave e a le clamave “biele, biele …” e ai mandave bušadis. Me mari, une dì, si è mitude dispus fra le vigne di cjase nostre e il cantêr e al moment just à dite: “cal sinti lui, cal cjapi la corona e cal buši la madaia”. A veve dit “corona e madaia” par vie che l’omp a l’ere “di là da l’aga” e podeve dasi che nol vês capît il furlan di Bertolasse.

Dopo, quant che in cjase vevin le sarturie, spes e volentêr, viodevin tal curtil che qualche gjaline a scomenzave a clopâ malamentri. Cussì, me mari, ai tirave il cuel e drenti tal durion ai cjatave simpri qualchi gusele. Me sôr Mirte a scovare le sarturie e dopo a lave a spacà li mundizis a li puaris gjalinis.

Ta le sarturie a stave in plante stabile me none, ancje quant che li feminis a vignivin a provà i vistîz. A me none ai plaseve scoltà la radio, pì da le television. Io eri pičule, lavi a li elementars. In chei ains, al dopo di misdì, viodevin “Non è mai troppo tardi”. Me none a saveve a lei ma no a scrivi. No ere mai stade a scuole ma a veve imparât le leture par mert di doi zovins, i fis dal paron dolà che a Udin, di fantate, a ere stade a lavorà. A veve parfin let qualche libri, come le vite di Sante Rita da Cascia. A mi e me none nus plasevin tânt li lezions di Alberto Manzi, il mestri da le trasmission, parcè al disegnave ce cal contave. Scomenzant cun t’un schiribiz, al faseve saltà fôr disêns meraveos. Me none a diseve che Manzi a l’ere propite un biel omp.

Miò nonu, cuissà parcè, a le veve su cu le garzone di me sôr, une frute tant biele, native di Pesaro. Ai diseve “zampognare, gniu, gnau, gniu, gnau …”. Le frute a rideve e no si le cjapave, anzi a lu clamave nonu cun afiet.

***

me sôr Mirte, a 20 ains, a si petenave "a la gatto", come Mina