Done Bete da le lenghe sclete

Me sôr Ninine a veve quindis ains quant che in biciclete a partive di Bertolasse, par rivà fin a Stelute, a lavorà ta le buteghe di mecanic di bicicletis di siò pâri.

Mica ca fos stade lì sôl par vendilis, li bicicletis, a saveve ancje comedâlis, come i garzôns ca lavoravin pal pâri.

Ninine, a l'è un non di fantasie. Mi soi visade che “Ninina” a le clamave “il velò” un frutut, nât in France, cal vignive a cjatà so none, le sartore ca veve le buteghe propite dongje l’oficine.

Il sorenom di “velò” si lu ere guadagnât parcè al domandave simpri “vélo, vélo” che, par fuarze, a voleve disi biciclette.

Io eri frute quant che un fantat, che Ninine a veve cognussût a cjase dai nostris vicinanz, pensânt a un stratagem par tornà a viodile, l'à sbusât une gome da le machine par fale comedà in oficine.

Il fantat, di lì a pôc, l'è tornat a lavorà in Canadà, ma, tra di lôr, l'è scomenzat un intens scambio di lètaris che, in chei timps, a rivavin par mâr.

Dopo, quant ca l’è tornât par un pôc in Italie, si son decidûz di maridasi e, subite dopo, son partîz in nâf pal Canadà.

Nostri pari, dopo tre ains, a l’è lât a cjataiu in aeroplano e, ta le valîs, a l’à partât une biciclitute a miò nevôt Ruiut, cal veve doi ains.

A mi, quant che eri pičule di asilo, le befane mi veve partât une biciclete. Ta le memorie le pensi come ca fos stade di un blu "carta da zucchero". Me sôr Ninine, ca veve 18 ains pi di me, mi veve juste dit che le befane a ere stade tal negozi par comprà regai.

Une dì, voi ta "le stanze vecje" e no cjati pì le biciclete. Le clamavin stanze vecje par vie che lì vevin il tinel partât da le cjase vecje di Bertolasse.

Miò pari a le veve vindude; par mè a ere doventade pičule ma a mi mi ere colât il côr di rabie.

Par là a scuole, che eri in seconde elementâr, mi veve date une cuissà tant vecje, cui cerclons di len che, par dì le veretât, a sameave a che di Fred Flingstone.

Une gnove, rosse, mi è rivade quant che ai finît le quinte.

Però, no mi eri mai vergognade di che vecje biciclete, anzi, contavi ai miò amîs le sò lungje storie, complete di ducju i siò parons, chei che prime di mè a le vivin doprade.

***

Al veve reson miò santul cal diseve che me sôr Ninine a sameave dute a Caterina Valente: "un soriso luminôs come il soreli".

Postato da: DoneBete a 15:31 | link | commenti (4) |

Commenti

#1   03 Febbraio 2008 - 18:45

 

si al jere un om valorôs e tu sês lade dongje ma no tu âs induvinât.
ducj doi partigjans e ducj doi furlans, ancje vittorio premoli, medaie d'aur al valôr che al jere nassût in provincie di gurize, ma chest "premoli" al jere propit di palasôl, gapist de bande dal mancin e salacor al si sarà platât cualchi volte ancje tal nestri bosc ......

scusimi se ti rispuint chi ma tal blog dal bosc o vin miôr fevelâ dome di chel argoment par sghindâ complicazions, sâstu il nestri al è un paîs une vore dificil …… ma tu che tu sês de basse come nô ce pensistu di cheste storie? che dal bosc brusse benintindût …..

premoli2008

#2   04 Febbraio 2008 - 19:20

 

...intant ti ai linkade ancje jo ;-)

dree

#3   05 Febbraio 2008 - 16:09

 

Vignint daûr dal Dree ti soi vignût a cjatâ. ben rivade Done Bete, gnove blogarine furlane!

furlan

#4   15 Febbraio 2008 - 09:59

 

Al dà melancunie. No sai parcé, ma si a simpri l'impression che prime al ere miôr di cumó. Dutcâs, lis feminis no vevin bisugne di mostrâ le panse par tirâ l'atenzion.

utente anonimo

Commenti