Done Bete, di pičule, a pritindeve che cu le machine di scrivi a si podès ancje sunà.

In cjase, drenti ta un armarut, a ere une machine di scrivi che siò pari al veve comprât ma che, par tancju ains, ere stade prestade a un sior cal faseve qualchi pràtiche pai paesans.

Done Bete ancjemò a no saveve scrivi ma, dato che ta l’asilo a viodeve li munis ca sunavin il piano, a si meteve ingenoglade devant da l’armarut, a cjalcjave sui tasč da le machine di scrivi e a fantasiave di sunà. Dopo, quant che li livutis, cu li letaris da l’alfabet, a si erin dutis ingrumadis tra di lôr, a clamave so sôr Ninine par disberdealis.

A “sunave” e a cjantave li canzons ca imparave ta l’asilo ma, di sigûr, ancje chês ca scoltave cui nonus a la radio che, pal nonu a l'ere "il radio" e pa le none "l'aradio"

Le none a veve une grande pasion par Claudio Villa, màssime quant cal cjantave Granada e il nonu a l’ere un grant stimadôr dal gjornalist Ruggero Orlando, ancje par vie dal cognom ca l’ere come il siò nom.

La radio “Zacchini”, che Done Bete a ten ancjemò in cjase, siò pari le veve cuistade cun d'un scambio di dôs bicicletis dal siò negozi. Chei ca vendevin li radio a ziravin pai paîs par mostralis.

Par tancju ains, dopo, no ere nancje mai stade impiade parcè a Bertolasse, il paîs prime di là ta le cjase gnove di Stelute, a stavin ta un cjasal dolà ca no rivave le lûs eletriche. Ta chei tîmps, Done Bete, no ere nancjemò nade.

Le radio a le vevin mitude sot dal jet di Mirte, une da li sôrs pi grandis. A Mirte, ca veve domandât ce môt ca si podeve fà par sintile sunà, ai vevin dit ca si veve di tacale tal baton da le panze.

Ninine à contât a Done Bete che, apene rivade ta le cjase di Stelute, à tacât subite le radio.

***