Done Bete da le lenghe sclete

A Done Bete, in prime elementâr, ere capitade le stesse mestre di quinte di so sôr Chicute. A cjase a erin contênz parcè a passave par jessi severe ma une vore brave insegnante.

A veve studiât a Rome, in plen ventennio, e a dave grande importance a “l’educazione fisica”.

La “z” a le pronunziave in maniere une vore sonore e chistu, pal dettato, a l’ere propite util.

Par fà gjinastiche a ordenave di partà a scuele “un quotidiano” par pojâlu, come un tapêt, su li breis dal curidôr tra li aulis.

Le mestre a ere une femine une vore ative, volontarie da le Crôs Rosse, referente da le “Dante Alighieri” e ta li ricorencis, come il 4 Novembre, a sfilave cun čhapiej che, come mode, a erin almancul di vinčh ains indavôr cul timp.

Spes, le mestre di Done Bete, a si infervorave a cjacarà di Garibaldi e Mazzini.

In paîs a ere forsi l’uniche a vè il frigo, ca l’à di jessi stât un premi ricivût par qualchi siò mert.

Il siò on a l’ere dispiardût in Russie. Si erin sposâz dopo ca l’ere stât siò alievo a li scuelis serâls e, duncje, al veve une vore di ains in mancul di î.

Le none di Done Bete, ca no le cognoseve, a veve dit: “a mi plasarès viodi le to mestre, dato che tu mi contis tantis robis di î”.

Alore Done Bete, sun t’un sfuiut di cjarte, à disegnade le mestre cun grande quantitât di particolârs: le cotule ca veve cjapât le forme da li clapis, li scarpis bassis e comudis, le mae impanide, i čhavêj tajâts senze tantis preciosetâz, li ğhambis pelosis e i poros neris sul nâs.

Li sôrs di Done Bete, ca erin tânt pì grandis, an duvût ricognosi che il ritrat a l’ere conforme a l’origjinâl.

Quant che a Done Bete, tal periodo da li vacancis estivis, a jere vignude le tos moltone, le mestre a ere stade a cjatâle e a i veve partât li caramelis. Ancje a scuele, cjarti voltis, le mestre a partave caramelis.

Done Bete no veve mai cjapât sberlis da le mestre, saben ca fos une vore svelte a molâlis. Chistu, a Done Bete, ai sameave une robe brute, come brute a ere “la fila degli asini”, dolà ca mandave a sintâsi che frutis ca fasevin masse erôrs tal dettato.

Capitave ancje ca si fasès petenà in classe, atrîs voltis ca fasès fà une durmidute sul banc.

A Done Bete le mestre ai veve gjavât un dint che nancje a nol clopave ma a l'ere brut, come rumiât, cussì ai veve fate le vore lì par lì in classe.

***

"erinnofili pro emigranti Società Dante Alighieri"

a ju vendeve le mestre e a costavin 10 liris da l'un

Postato da: DoneBete a 17:26 | link | commenti (13) |

Commenti

#1   12 Marzo 2008 - 19:58

 

“la fila degli asini”

ce triste che mestre li'.

normansc

#2   13 Marzo 2008 - 18:14

 

Ce biele conte, ma ce biele sciore bete:-) Al mi reste tal cjâf chê des gjambis pelôsis ch'a mi a fat pensâ...Jo ch'o eri inamorât de maestre, o vevin stât a Castelmont in gjite e come ch'a veve mitût sù i bregonuts e ch'a i erin un tic curts o no savevi cemût fâ par no cjalâ i pêi plui luncs che chei âltris ch'a si viodevin cuant che jê e lave in sù devant di nô...:-)
Jaio

utente anonimo

#3   13 Marzo 2008 - 18:18

 

Il mestri di miò nonu a l'ere un predi. Par punizion al faseve fà cu le lenghe crôs su li breis dal paviment o ingenoglasi su claps a ponte spizzade.

DoneBete

#4   13 Marzo 2008 - 18:26

 

Eh, altris timps...No vevio stât punît parcé ch'o vevi fat cuintri ae muinie che mi veve butât par tiare e sentade sù di mé a mi pestave parcé ch'a crodeve ch'o vevi blestemât:-) Altris timps!

utente anonimo

#5   14 Marzo 2008 - 22:25

 

Done Bete / Jajo

Erino mestris o uficiâi de Ghestapo ?

normansc

#6   14 Marzo 2008 - 23:20

 

li mestris dai ains dopo son stadis completamenti diferentis. A erin une vore pì zovinis e quindi di dute atre formazion. Une robe a mi reste ridicule, ancje di chisti mestris: quant che a incaricavin di là a controlà li ongulis di chei atris fruz e dopo riferì cui ca li veve sporcjs.

DoneBete

#7   23 Marzo 2008 - 12:23

 

Tancj auguris di BUINE PASCHE! (fracait achì)

Chris77

#8   23 Marzo 2008 - 17:24

 

Siore Bete, So volês vignî a viodi lis seris reâls, a saran viertis al public par 10 dîs come ogni an al mês di avrîl. O podês stâ da me, ch'o vin un apartament vueit al tierç plan (Baste no vê masse reumatismos par lâ sù pes scjalis:-) Buine Pàsche intant.

utente anonimo

#9   23 Marzo 2008 - 17:41

 

grazie, grazie pa l'invît. Pa li scjalis si cumbine ... soi pur lade sui e iù pal "sentiero dell'amore" a le Cinque Terre mentri che vevi un peit siarat ta une scarpone par vie di un didut rot le dì prime di partì pa le gjte.

DoneBete

#10   25 Marzo 2008 - 13:41

 

A saran viertis al public dal 20 avrîl al 9 di mai
Mandi

utente anonimo

#11   25 Marzo 2008 - 17:14

 

grazie!

DoneBete

#12   01 Aprile 2008 - 17:41

 

Nedda, une mestre tânt ninine a mi à scrit cussì:
Cara amcia nuova,
dammi del tu, si fa prima!
Bellissimi i racconti di "done Bete",pieni di succo, frizzanti, nostalgici. Ho capito quasi tutto.
Tanti anni fa avevo, in Toscana, una collega maestra della Carnia (di Ovada). Si parlava talvolta in dialetto, io trentino, lei friulano.
Peccato che la tua bella storia vera la possono capire solo in pochi, dovresti apporre, in coda, la versione in italiano.
Ah! quella maestra così brutta e "militare" colle gambe pelose.
E i titoli di tante canzoni dell'epoca e le belle fotografie.
Bava, brava, dieci!
Un abbraccio, a rileggerci,
nedda

http://neddagottardi.splinder.com/

DoneBete

#13   12 Aprile 2008 - 18:07

 

ioii ce gùst podei scrìvi e lèi in màrilènghe, soi ùne vòre contènt di vè cjiàtàt chèst sito ,vègnàrai plùi dispèss a viòdi. Mandi a dùt il friùl

utente anonimo

Commenti